محمد اشرف غنی رئیس جمهوری اسلامی افغانستان با امام علی رحمان رئیس جمهور تاجیکستان، صحبت تیلفونی نمود.
به گزارش پایگاه اطلاع رسانی موسسه فرهنگی اکو به نقل از ارگ ریاست جمهوری افغانستان، در این مکالمۀ تیلفونی، سران دو کشور در مورد روابط دوجانبه به ویژه در خصوص تجارت، ترانزیت، تقویت هر چه بیشتر همکاری های منطقوی و افزایش همکاری ها در امتداد سواحل دریای آمو، صحبت کردند.
رئیس جمهور غنی گفت که سرحد افغانستان و تاجیکستان به نقطۀ دوستی و پیشرفت مبدل می گردد و نمونۀ دوستی و همکاری خوب میان دو کشور همسایه خواهد بود.
امام علی رحمان رئیس جمهور تاجیکستان از پروسۀ صلح به رهبری و مالکیت حکومت افغانستان حمایت قوی کرد و ضمن حمایت از موقف رئیس جمهور، وعده داد که تاجیکستان در نشست های منطقه ی و بین المللی، در کنار افغانستان خواهد بود و از موقف حکومت افغانستان حمایت می نماید.
رئیس جمهور امام علی رحمان از رئیس جمهور غنی به خاطر گسترش روابط دوجانبه و چندین جانبه و توسعه همکاری ها، دعوت کرد که به تاجیکستان سفر نماید و رئیس جمهور غنی با ابراز امتنان این دعوت را پذیرفت و از امام علی رحمان به خاطر سفر به افغانستان نیز دعوت بعمل آورد.
هر دو جانب توافق کردند که تحت ریاست محمد حنیف اتمر سرپرست وزارت امور خارجه، هیئت بین الوزارتی در روزهای نزدیک به تاجیکستان سفر نماید و روی آجندای نشست رؤسای جمهور تاجیکستان و افغانستان به خاطر همکاری های بیشتر، کار کند.
در اخیر این صحبت تیلفونی، توافق شد که هیات افغانستان با هیات تاجیکستان در مورد مسایل سیاسی میان دو کشور، همکاری های اقتصادی و امنیتی به ویژه مبارزه علیه تروریزم و مواد مخدر، نیز بحث و تبادل نظر نمایند.